لسه بدري

لسه بدري متستعجلشي .. هنعيش صدقني بكرا تمشي
بكرا تفرج وتحوش مهري .. وتبقي انت راجلي وضهري
واجيب منين مانتي عارفه .. انتي ازاي من بكرا مش خايفه
طافح الكوته ومن شغله لشغله وابوكي عاطيني مهله اجيب شقه وشبكه وبوتاجاز من أبو شعله
ويوم ما قلت هتضحك وعملنا ثوره .. اتارينا كشفنا العوره
قفلوا المصنع وسرحونا واخدوا قوتنا وسرقونا
وضربونا وبهدلونا وقتلونا وسحلونا وسجنونا
وطلع مرشدهم من الحاره المزنوقه وبوش شبه البومه قال ما ذنب النباتات؟؟
روحت اشتكي قالولي حرقتوا المقرات
طب انا عايز شغلانه .. حرقتوا المقرات
بس أنا ماليش في السياسه .. حرقتوا المقرات
يابيه انا بقيت عاطل .. مش انت اللي عامل مناضل
طب اجيب منين الرغيف؟؟
اطلق اللحيه وخليك لطيف؟
بس انا مش مسلم .. ارحل الي كندا ومتبقاش سخيف
او احمد ربنا انك عايش وبنديلك حته من الرغيف؟
لازم نستحمل احنا في أزمه .. لازم نستغني عن اللي ملوش لازمه
البلد واقعه ولازمها استقرار .. يابيه ده كده استحمار
كل يومين حادثة قطر .. وانهيار كام عقار
الناس وافقت علينا وعلي الدستور .. ووافقوا علي اللي جبناه طرطور .. امشي جنب الحيط وخليك شطور
طيب ملمتوش الزباله ولا حليتوا أزمة المرور
كلمه تاني هنجيب الرجل الشريف فتحي سرور
يعني خلاص خدنا الخابور؟ .. تكيف معاه وعيش يا أمور
وتقوليلي هنتجوز عن قريب .. انا ماليش فيها حبيب
هسافر واسيب البعيد والقريب .. لا لازم تقعد وتعافر
ده انا بلدك متسيبنيش للغريب
اعملك ايه مانتي اللي كارهاني .. وفي عيشتي مطهقاني وفي ديوني مغرقاني وطيرتي بت الجيران اللي عاجباني واهلها جوزوها لواحد إخواني
ده الموت بقي ارحم من العيشه فيكي .. اعيش معاكي ازاي وانا مش قادر اراعيكي ..
اقولك بحبك ازاي وانا مش قادر احميكي ..
ضحيت عشانك بروحي ونزلت ومخوفتش من الموت .. وانتي خذلتيني بالسكوت
مقدرش اعيش فيكي غير بعد ما أهلك يصحوا من الموت.